Ferdinandu

Munro Leaf
Traduttu in corsu da i liceani di u Fangu - Bastia, diretti da M. Adami, prufessore

In tempu d’una volta ci era in Spagna...
...un giovanu torru chì si chjamava Ferdinandu.
Puntendu si di capu tutti l’altri torri allevati cun ellu currianu è saltavanu tutta a santa ghjurnata
Ma micca Ferdinandu.
Li piacia à esse pusatu chetamente è à muscà u prufume di i fiori.
In lu pasculu, avia una piazza prediletta : sottu à una suvera.
À u frescu di quellu arburu, li piacia à gode si a ghjurnata atturniatu da u prufume di i fiori.
A mamma, chì era una vacca, di quandu in quandu purtava u penseru per ellu. Temia chì a solitudine li sia penosa.
« Cumu hè chì t’ùn corri cun l’altri giovani torri ? Cumu hè chì t’ùn ghjochi micca ? Cumu hè ch’ùn t’imbaruffi cun l’altri ? » dumandava a mamma.
Ma Ferdinandu scapacciava : « Mi piace di più à stà quì, pusatu chetamente è rispirà u muscu di i fiori. »
A mamma vedia ch’ellu ùn s’annoiava solu, è cum’ella era una mamma cumprensiva - ben ch’ella ùn fussi chè una vacca - u lacava in pace, ch’ellu si campi.
L’anni passonu è Ferdinandu ingrandava è diventò tamantu è scupignu.
Tutti l’altri torri ch’eranu ingrandati cun ellu in u listessu pasculu s’imbaruffavanu a ghjurnata sana.
A si luttavanu corna à corna.
Ciò ch’elli bramavanu, era d’esse scelti per participà à e corse di i torri in Madrid.
Ma micca Ferdinandu. Li piacia sempre à esse pusatu chetamente sottu à a suvera atturniatu da u prufume di i fiori.
Un ghjornu ghjunsenu cinque omi, incalfati di cappelli da ride si ne.
Venianu à sceglie pè e corride di Madrid u più maiò, u più rapidu è u più salvaticu di i torri.
Tutti l’altri torri currianu, suffiendu è catapughjendusi, saltendu è fendu a sbacca. Ognunu credia chì l’omi l’avianu da sceglie perchè ch’ellu era u più forte è u più tremendu.
Ferdinandu, ellu, sapia per sicuru ch’omu ùn lu sceglierebbe micca è n’avia poca primura.
Si n’andò, cum’è di solitu, vicinu à a suvera.
Pensendu di pusassi in l’erba liscia è fresca, si pusò nantu à un bufone.
Sì tù fussi un bufone è ch’un torru ti sì calassi addossu chì feresti ? U punghjeresti. Hè ciò ch’ellu fece u bufone.
Ohi ! Sente ! Ferdinandu schiglia un saltu. Cum’è spiritatu, core in lu pratu, soffia, erpia è zambra.
Hè cusì chì i cinque omi u vissenu è s’intusiasmonu.
« Eccu u più grande, u più terrorizante di tutti i torri ».
Appuntu ciò chì li ci vulia per e corride di Madrid.
Allora u si purtonu nantu à un carru à l’arene.
Era un ghjornu signalatu ! E bandere schjaffittavanu, orchestri sunavanu...
... è tutte e belle signore avianu fiori in li capelli.
In l’arena, a sfilata cuminciò.
In prima, affacavanu i banderilleros purtendu zimbroni infiucchittati ch’elli ficcherebbenu in tupezzu di u torru pè azzizzà lu è arrabbià lu.
Dopu venianu i picadors nantu à i so cavalli magri.
Eranu armati di lancia longhe chì ne zingherebbenu u torru pè arrabbià lu ancu di più.
In fine, u matador, u più fieru di tutti.
Mustrava a so superbia è s’inchinava di nanzu à e signore.
Avia una cappa rossa è una spada chì li ghjuverebbe à tumbà u torru.
Tandu ghjunse u torru, è a sai qual’era ?
FERDINANDU
Omu u chjamava Ferdinandu u Tremendu è tutti i banderilleros n’avianu a paura, tutti i picadors n’avianu a paura è u matador avia u telu à l’osse.
Ferdinandu corse ver dì u mezu di l’arena è u publicu li fece festa è sciaccamanò. Tutti pensavanu ch’ellu avia da cumbatte accanitu, suffiendu da i nari è sciacchendu curnate furibonde.
Ma micca Ferdinandu. Quand’ellu fù à mezu à l’arena, visse fiori in li capelli di tutte e belle signore ; tandu si pusò calmu calmu, è annasò i so prufumi.
Mancu s’avia da batte è fà l’innarteriatu. Simplicemente s’era pusatu da muscà u prufume di i fiori.
I banderilleros eranu in le furie,
i picadors ancu di più in le furie è u matador era tantu in le furie ch’ellu ne pienghjia da a rabbia chì ùn si pudia dà di cappa è di spada.
È, à sente l’ultime nove, hè sempre à pusà custì sottu à a so suvera, rispirendu calmu calmu u prufume di i fiori.
Ma sebbiatu ch’ellu hè !