L’imperadore spugliatu

D’après Les contes d’Andersen (L’empereur nu)

In tempu d’una volta, c’era un rè chì li piacianu tantu i vestiti ch’ellu spendia tutta a so furtuna per i so panni. Quand’ellu passava in rivista i so suldati, quand’ellu andava à u spetaculu o quand’ellu spassighjava, ùn avia per scopu chè di fà vede i so panni novi.
À tutta ora cambiava di panni.
È, cum’è ellu si dice di un rè : « hè à u cunsigliu », si dicia d’ellu : « hè sempre in cameretta ».
A capitale era  una cità piena d’allegria grazia à i frusteri di passeghju. Ma, un ghjornu s’affacconu dui scrucconi chì si facianu passà da cusgidori è si vantavanu di tesse a stofa a più bella di u mondu. Non solu eranu bellissimi i culori è i disegni, ma i panni fatti cù quella stofa avianu una qualità maravigliosa : Diventavanu invisibbili per ogni parsona ch’ùn sapia fà bè u so travagliu o chì era appena chjuccutu.
« Sò panni for’di prezzu » pensò u rè. Grazia à elli puderaghju ricunnosce tutti l’incapaci di u mo guvernu : saperaghju distingue l’àbbili da i simplicioni. Iè, mi ci vole quella stofa ».
È avanzò à i dui scrucconi assai muneta da ch’elli possinu cummincia subbitu u so travagliu.
« Vocu à mandà à i tessitori u mo vechju ministru pensò u rè. Ghjè ellu chi pò ghjudicà u megliu a stofa : sì sfarenza tantu da u so spiritu chè da e so capacità. »
L’onestu vechju ministru entrò in a sala induve i dui scrucconi travagliavanu cù tilaghji vioti.
« Oimè ! pensò aprendu l’ochji. Ùn vecu nunda. » Ma ùn palisò nunda.

U liceanu - Edizione 2015 - 03.06.2015